Daut Haradinaj pritet në Viti nga veteranët e UÇK-së: Këtyre burrave vendi u ka borxh, do t’i trajtojmë me dinjitet e respekt

Daut Haradinaj nga AAK është mirëpritur dje në Viti, në një pritje të organizuar ku pjesëmarrës ishin veteranët e Ushtrisë Çlirimtare të Kosovë.

Haradinaj tha se pjesëmarrja në këtë pritje ishte nderë për të, teksa theksoi kontributin e madh të të pranishmëve.

“Sonte në Viti, bashkë me Dardan Krasniqin dhe Blerim Bajramaj, në pritjen e organizuar nga Fehriu dhe shokët e tij, pata nderin të jem mes veteranëve të UÇK-së, njerëzve që historinë e Kosovës e kanë shkruar me sakrificë, guxim dhe besë. Krah këtyre trimave që e meritojnë më të mirën në Kosovën e lirë për të cilën dhanë gjithçka”, tha ai.

Haradinaj ndër tjera premtoi do të punojnë në përfshirjen e veteranëve në pagën minimale dhe të drejtën e punësimit, teksa shtoi se kujdesi ndaj tyre është obligim.

“Në programin tonë, veteranët do të trajtohen me dinjitet dhe respekt, do të përfshihen në pagën minimale, dhe të drejtën e punësimit e cila u është mohuar padrejtësisht për shumë kohë. Këta burra nuk kursyen asgjë për Kosovën, as jetën, as rininë, dhe ky vend u ka borxh shumë më tepër sesa fjalë. Është nder dhe përgjegjësi e madhe t’ju kemi në krah. Kujdesi ndaj këtyre kategorive është obligim i yni dhe asnjëherë nuk do t’ju mungojë”.