E përderisa bora dhe ngricat vështirësojnë qarkullimin në magjistrale e rrugë të tjera, ajo mirëpritet në Brezovicë.
Megjithatë, atje vazhdojnë problemet e përvitshme, siç është mungesa e parkingut, por edhe vështirësitë për t’u ngjitur deri në majë. Pavarësisht vështirësive, Brezovicën e vizituan shumë turistë.
Si çdo vit, në mungesë të një parkingu, rruga deri te qendra e skijimit në Brezovicë mbetet sfidë në vete.
Veturat e parkuara në njërën korsi të rrugës po shkaktojnë kolona për të arritur në cak, derisa nevojitej edhe asistimi i policisë për të evituar kolonën.
Por, e gjithë kjo sfidë harrohet kur arrin në kodrën e bardhë të mbuluar nga bora.
Ndonëse ka kaluar pothuajse një muaj nga fillimi i stinës së dimrit, Brezovica u zbardh tek mbrëmë me një sasi të konsiderueshme të borës.
Kjo menjëherë nxiti turistët që të dielën ta kalojnë në Brezovicë.
Mosha të ndryshme u panë të shijojnë sportin e skijimit, ndonëse temperaturat ishin të ulëta.
Ajër Gashi me familje, ndërsa shpreh kënaqësinë me Brezovicën, fton bashkëmoshatarët e tij të vizitojnë këtë pamje piktoreske.
“Kom ardh me familje, kemi hyp në teleferik, bora shumë e mirë, e pastër dhe mirë kom kalua. Çdo vikend ia kisha preferua krejtve të vini në Brezovicë për ta parë natyrën e Kosovës dhe ta shijoni”, tha Ajër Gashi, vizitor.
Si ai, të dielën në Brezovicë e kaluan edhe shumë familjarë të tjerë, disa prej tyre mërgimtarë.
“Kam ardhur me familje, prej Kanadasë kam ardhur veç vet për këtë vit të ri, e kam ardhur me vëllezër në Brezovicë pak me shijua venin. Është hera e parë që vijë këtu. Për xhepin e kosovarëve janë pak lart, po pasi shkojnë për shtet tonin është krejt në rregull”, tha Valmir Morina, vizitor.
“E mirë, e freskët, e ftoftë, pak më shumë për fëmijë se sa për neve, po për fëmijë i kemi pru. Kemi ardhur për fëmijë, po besoj që mirë, pak jo shumë e kujdesshme, duhet mu kujdes ma shumë për shkak të hyrje-zbritjeve, ngritjeve edhe rruga pak e pakalueshme”, Haxhi Geci, vizitor.
Ata që e shijuan më së shumti borën u panë të vegjlit. Të rinjtë që pasion kanë skijimin, megjithatë, kanë kritika për mirëmbajtjen e qendrës së skijimit, për çka kërkojnë më shumë investime.
“Çmimet nuk janë fort të shtrenjta, po pistën duhet me e ndreq pak ma mirë, me qenë ma të përgatit pak”, Arian Shkupolli, vizitor.
Përveç vizitorëve nga Kosova, edhe këtë dimër nuk munguan ata nga Shqipëria, Maqedonia e shtetet tjera përreth. “Ishte eksperienca më e bukur që kam kaluar ndonjëherë, e adhuroj këtë vend”, tha një vizitore.
Edhe operatorët privat që shesin pajisje për skijim thanë pas kamerës se interesimi i qytetarëve është rritur këtë vikend, derisa thonë se çmimet e produkteve që ata i shesin janë të arsyeshme. Një ndër atraksionet kryesore në Brezovicë mbetet teleferiku, e që për ta shfrytëzuar çmimet nisin nga 3 euro deri në 22.
