Sali Berisha është ndalur te protestat dhe zhvillimet politike në vend, duke i cilësuar ato si një faktor me ndikim të madh në skenën aktuale.
Ai u shpreh se këto protesta kanë ndikuar drejtpërdrejt në imazhin politik të kryeministrit Edi Rama, duke e cilësuar atë si të delegjitimuar në sytë e opinionit publik ndërkombëtar dhe vendas.
Sipas tij, lëvizja qytetare mbetet e rëndësishme pavarësisht përpjekjeve për ta diskredituar apo ndikuar nga faktorë të ndryshëm.
Gjovi Nikolli: Përshëndetje Doktor Berisha, unë si demokrat atë protestë nuk e shoh si shpresë për të rrëzuar Ramën, ajo protestë është e mbytur me spiunë dhe patronazhistë. Unë mendoj se opozita do të ishte më mirë t’i përkushtohet punës për përgatitjen për zgjedhjet se do të jenë në pranverën e ardhshme, sesa t’u shkojmë mbrapa patronazhistëve, pasi atë protestë e komandojnë patronazhistët. Ata i prijnë, ata mbajnë fjalime, për mua asnjë vlerë nuk ka. Zoti ju ruajt doktor Berisha!
Sali Berisha:
Të falënderoj për pyetjen dhe komentin.
Tani, çfarë mund t’u them unë ju për komentin tuaj. Nuk ka dyshim se në çdo lëvizje të hapur, pa përjashtim, përpiqen të ndërhyjnë dhe ndërhyjnë shumë duar.
Por të garantoj që pavarësisht nga këto përpjekje, pavarësisht nga përpjekjet e opozitës së opozitës për ta shfrytëzuar atë kundër opozitës së vërtetë.
Pavarësisht nga patronazhistët, për ta njollosur atë si gjoja një lëvizje të udhëhequr ndaj tyre.
Pavarësisht nga ndonjë ekstremist që hedh parulla të papranueshme, ajo lëvizje, u garantoj, është një lëvizje e mrekullueshme, madhështore rinore dhe qytetare.
Ndaj dhe edhe ju u ftoj të mos na pengojnë gjethet dhe degëzat për të parë trungun madhështor të asaj lëvizje.