Astrit Isufi ndodhet në QKUK, kjo është gjendja e tij shëndetësore

I dyshuari për vrasjen e dy vëllëzërve dje në Malishevë Naim e Driton Morina, Astrit Isufi, ndodhet momentalisht në Qendrën Klinike Universitare të Kosovës (QKUK), pasi i njëjti ka plagë nga arma e zjarrit, raporton GazetaDemos.

Siç mëson Demos, gjendja e tij pas trajtimit mjekësor që iu dha pas momentit të arrestimit, është stabile.

Policia njoftoi se i njëjti ra në prangat e tyre mëngjesin e sotëm, rreth orës 06:30, pasi u gjet në një shtëpi të pabanuar në fshatin Plloqicë.

Prokuroria bëri të ditur se rreth rastit janë duke u marr veprimet e nevojshme, teksa brenda afatit të paraparë ligjor, ndaj të dyshuarit A.I., do të paraqitet kërkesa për caktimin e masës së paraburgimit në Gjykatën kompetente.

“Prokuroria Themelore në Gjakovë, njofton opinionin publik, se lidhur me rastin e vrasjes së dyfishtë të ndodhur në fshatin Golluboc, Komuna e Malishevës, është arrestuar personi i dyshuar A.I., i cili më parë kishte qenë në arrati.

Lidhur me rastin, Policia e Kosovës, në koordinim të plotë me Prokurorin e Shtetit, është duke ndërmarrë të gjitha veprimet e nevojshme.

Brenda afatit të paraparë ligjor, ndaj të dyshuarit A.I., do të paraqitet kërkesa për caktimin e masës së paraburgimit në Gjykatën kompetente”, thuhet në njoftim.