Arrestimet në veri për krime lufte – reagojnë në Beograd, flasin për “dëbim të serbëve”

Pasi herët këtë mëngjes në Zubin Potok u arrestuan nëntë persona nën dyshimin për krime lufte, ka reaguar e ashtuquajtura zyrë për Kosovën në qeverinë serbe, duke e lidhur aksionin policor me “dëbim të serbëve”.

“Me qëllim që të ushtrojë presion shtesë mbi Zubin Potokun, të dëbojë dhe të frikësojë serbët e mbetur në Kollashinin e Ibrit, Albin Kurti dërgoi këtë mëngjes falangat e tij policore për të arrestuar nëntë serbë me pretekstin e përfshirjes së pretenduar në krime lufte. Njësitë e armatosura të Kurtit hynë këtë mëngjes rreth orës gjashtë, pikërisht në Kryqëzimin, në shtëpitë e kryefamiljarëve serbë në fshatrat Drien, Kalludër, Velji Breg, Crepuljë, Uglar dhe shoqëruan nëntë serbë. Ndërsa njerëzit flinin, ata u zgjuan nga policia, e cila thyente dyert dhe gjithçka para vetes”, thuhet në reagim, raportojnë mediat serbe.

Kjo zyrë tha se ka kontaktuar me familjet e të arrestuarve që atyre tanë “t’u sigurohet mbrojtje juridike”.

Beogradi i quajti arrestimet “hakmarrje ndaj serbëve”, dhe për “zhvendosjen e opinionit publik” nga aktgjykimi dënues ndaj ish-krerëve të UÇK-së në Hagë.

Gjatë një operacioni të zhvilluar në Zubin Potok, nëntë persona janë arrestuar nën dyshime për krime lufte kundër popullatës civile. Operacioni ndërlidhet me rastin e njohur si “Grupi i Intelektualëve”.

Sipas Prokurorisë Speciale dhe Policisë së Kosovës operacioni i koduar “Dosja 23” u realizua në orët e hershme të mëngjesit të 27 shtatorit në Zubin Potok, në veriun e Kosovës, të banuar me shumicë serbe.

Operacioni vjen pasi më 19 shtator u konfirmua, përmes analizës së ADN-së, se mbetjet mortore të tri viktimave të gjetura në varrezat masive në Zubin Potok, i përkisnin “Grupit të Intelektualëve”.