Profesori universitar, Dritëro Arifi, ka deklaruar se shteti i Kosovës ka dështuar në lobim dhe diplomaci për çështjen e ish-krerëve të UÇK-së që po gjykohen në Hagë.
Duke folur në emisionin “Info Magazine” në Klan Kosova, Arifi tha se institucionet e Kosovës nuk kanë arritur t’i realizojnë objektivat e tyre në raport me Gjykatën Speciale.
Ai theksoi se, sipas tij, shteti ka dështuar edhe në shpjegimin e arsyes se si dhe pse Gjykata Speciale ka devijuar nga qëllimi për të cilin është themeluar dhe çfarë pasojash ka prodhuar.
"Ne si shtet kemi dështuar për të realizuar objektivat tona në raport me Gjykatën Speciale apo respektivisht me djemtë tanë atje me Hashim Thaçit dhe të tjerët. Pra shteti ka dështuar në aspektin e lobimit, diplomacisë, pra përfaqësimit, sensibilizimit të çështjes se kjo gjykatë e ka devijuar nga ajo për çka është krijuar. Pra këtë shteti jonë qëllimshëm, pra qëllimshëm duhet me e potencu fjalën seriozisht ka dështuar, pra qëllimshëm me e shpjegu pse ka devijuar dhe çka ka prodhuar", tha ai.
