Ambasadori Dugolli e pret në Uashington kryeprokurorin Isufaj, i cili nuk pëlqehet nga Kurti dhe Osmani

Kryeprokurori i Prokurorisë Speciale të Republikës së Kosovës, Blerim Isufaj, nuk pëlqehet nga kryeministri Albin Kurti dhe Presidentja Vjosa Osmani, por respektohet nga përfaqësuesi i tyre në ShBA.

Ambasadori i Kosovës në Uashington, Ilir Dugolli, sot ka pritur në zyre Kryeprokurori i Prokurorisë Speciale të Kosovës, Blerim Isufaj, i cili që disa vite nuk po dekretohet për Kryeprokuror të Shtetit nga presidentja Vjosa Osmani.

Në profilin e saj në Facebook, ambasada e Kosovës në ShBA ka postuar disa fotografi ku shihet delegacioni i Kosovës që ka udhëtuar për në Uashington për të marrë pjesë në ceremoninë e Lutjeve të Mëngjesit.

Aty shihet prokurori Isufaj dhe shumë zyrtarë të opozitës.

“Sot në Ambasadë kishim kënaqësinë të mirëpresim pjesëmarrës nga Kosova në Mëngjesin e Lutjeve, në mesin e tyre deputetë, ndërmarrës, përfaqësues të komunitetit e të mediave”, thuhet në postim e Ambasadës së Kosovës.

Në këtë ceremoni nuk ka marrë pjesë askush nga VV-ja.

Në vitin 2023, gjatë një seance në Kuvendin e Kosovës, Kurti kishte drejtuar akuza të ashpra ndaj prokurorit Isufaj, duke thënë se nuk do të mund të bëhet kurrë Kryeprokurori i Shtetit.