Deputeti i Vetëvendosjes, Adnan Rrustemi, ka reaguar lidhur me deklaratat dhe aludimet për një lidhje familjare të tij me personin e arrestuar, duke i cilësuar ato si të pabazuara.
Rrustemi ka dënuar edhe gjuhën kërcënuese dhe fyese të përdorur ndaj Ramush Haradinajt, duke thënë se dallimet politike nuk duhet të shndërrohen në gjuhë të tillë.
Ai ka sqaruar se personin në fjalë nuk e njeh personalisht, ndërsa si emër e ka dëgjuar gjatë viteve të fundit dhe fushatave, duke e përshkruar si ish-ushtar të UÇK-së që jeton prej më shumë se 25 vitesh në Obiliq.
REAGIMI:
Së pari, gjuha e personit në fjalë ndaj Ramush Haradinajt është gjuhë e papranueshme e kësisoj e dënueshme. Ajo gjuhë nuk mund të justifikohet pavarësisht nga kush vjen. Sfera publike ka nevojë më shumë se kurrë për racionalitet. Dallimet në bindje politike nuk mund të rrëshqasin në gjuhë kërcënuese e fyese si kjo ndaj Ramush Haradinajt e ndaj askujt tjetër.
Së dyti, aludimet për lidhje familjare me të arrestuarin janë krejtësisht të pabazuara. Personin në fjalë me pa nuk do ta njihja, por si emër kam dëgjuar. Kam dëgjuar vitet e fundit e gjatë fushatave, si ish ushtar i UÇK-së që jeton mbi 25 vite në Obiliq. As nuk e kam pa e as nuk e kam ditur që ndodhet në Kuvend dhe në cilën kohë sa isha unë aty. Është e vërtetë që unë i kam dajtë nga Dobraja e Madhe, ku Llugiqët janë mbi 300 shtëpi. Si kudo, edhe aty ka lloj lloj personash. Nga persona që nuk kanë mbajtur qëndrimin e drejtë për kombin e vendin, deri te ushtarë të shumtë të UÇK-së, e heroi kombëtar nga kjo familje e nga ky fshat.
