Abdixhiku: Programi i LDK-së parasheh rritje pagash, investime të mëdha dhe projekte infrastrukturore

Kryetari i Lidhjes Demokratike të Kosovës (LDK) dhe kandidati për kryeministër, Lumir Abdixhiku, ka deklaruar se vullnetarët e kësaj partie do ta shpërndajnë programin qeverisës të LDK-së në të gjithë Kosovën.

Abdixhiku ka thënë se programi i LDK-së është më i miri që ka ndonjë parti politike në vend, duke theksuar se ai përfshin rritje të ndjeshme të pagave në sektorin publik. Sipas tij, programi parasheh rritje page për rreth 80 mijë të punësuar, ku mësuesit do të paguhen me 1 mijë euro, policët dhe zjarrfikësit me 900 euro, ndërsa mjekët me 1 mijë e 200 euro.

Ai shtoi se programi i LDK-së synon edhe punësimin dhe trajnimin e 40 mijë të rinjve në sektorin e teknologjisë informative, si dhe garantimin e punës për secilin të sapodiplomuar, me pagë prej 500 euro.

Sipas Abdixhikut, programi përfshin edhe përkujdesje për pensionistët. Ai tha se pensionet do të rriten çdo vit, me 200 euro në vitin e parë, 250 euro në vitin e dytë dhe 300 euro në vitin e tretë të qeverisjes.

Abdixhiku theksoi se programi i LDK-së është edhe zhvillimor, duke përfshirë ndërtimin e një centrali të ri me gaz, stadiumit të ri kombëtar, spitalit të ri, si dhe projekte të mëdha infrastrukturore që, sipas tij, kanë munguar në Kosovë gjatë pesë viteve të fundit.

Ai deklaroi se në qeverisjen e tij do të realizohet Autostrada e Gjilanit, e cila, sipas tij, është lënë në stagnim, si dhe do të përfundojnë rrugët për Pejë, Mitrovicë dhe Gjakovë.