Agjencia për Menaxhim Emergjent ka njoftuar se gjatë ditës së djeshme janë regjistruar 97 vatra zjarri në Kosovë. Në mbrëmje 26 nga këto vatra kanë qenë aktive, teksa për ditën e sotme nuk ka ndonjë përditësim.
Zjarret janë rritur shumë gjatë pasdites.
Situata më e rënduar është paraqitur në komunat Klinë, Vushtrri, Podujevë dhe Mamushë.
“Kjo rritje e vatrave të zjarrit ka krijuar vështirësi të mëdha për ekipet reaguese në terren. Situata aktualisht është nën kontroll, por mbetet mjaft sfiduese”, thuhet në njoftim.
Agjencia u ka bërë apel të gjithë qytetarëve që të denoncojnë pranë organeve ligjzbatuese çdo rast të zjarrvënies, të shmangin çdo veprim që mund të shkaktojë zjarr dhe të raportojnë rastet urgjente në numrat 112, 193 dhe 192.
“Njëkohësisht, Agjencia shpreh mirënjohje për përkushtimin dhe angazhimin e pjesëtarëve të Njësive Profesionale të Zjarrfikjes dhe Shpëtimit, të cilët po veprojnë pandërprerë në terren për menaxhimin e situatës, Policin e Kosoves, dhe FSK-në”, thuhet në njoftim.
