Është publikuar mesazhi i kërkimfaljes që familjarët e Eqrem Avdullahut ia kanë dërguar familjes së kryetarit të Organizatës së Veteranëve të Luftës së UÇK-së, Hysni Gucati, pas rastit të kanosjes për të cilin Avdullahu është shpallur fajtor.
Në fotografinë e publikuar shihet një mesazh, për të cilin thuhet se është dërguar nga familjarët e Avdullahut, ku kërkohet falje për komentin kërcënues të bërë ndaj Gucatit.
Në mesazh, një person që prezantohet si djali i të akuzuarit shpreh keqardhje për atë që ka ndodhur dhe kërkon falje në emër të babait dhe familjes së tij, duke theksuar se komenti nuk është dashur të publikohej dhe se edhe vetë familjarët janë ndier të rënduar nga rasti.
“Përshëndetje i nderum, unë në emrin e babës tem që t’ka ofendu me komente të kërkoj sinqerisht falje edhe në emër të vëllezërve t’mi… Besom që edhe mu m’vjen rënd që e kam pa këtë koment…”, thuhet ndër të tjera në mesazhin e publikuar.
