Armiku i padukshëm i zemrës suaj nuk është kolesteroli

Një kardiolog ka bërë një paralajmërim për një lloj ushqimi i cili sipas tij është më i dëmshëm për zemrën sesa kolesteroli i lartë.

Specialisti i zemrës, Dmitry Yaranov, shpjegoi në Instagram se marrja e sheqerit është e lidhur me sëmundjet kardiovaskulare dhe diabetin, duke u bërë thirrje njerëzve të zvogëlojnë konsumin për një shëndet më të mirë.

Ai tha: “Si kardiolog, shoh sëmundjet e zemrës të shkaktuara nga më shumë sesa vetëm kolesteroli. Ekziston një shtesë e zakonshme, e fshehur në pije, ushqime të lehta, salca dhe ushqime të “shëndetshme” të cilat po dëmtojnë zemrën dhe po nxitin diabetin. Vetëm një porcion në ditë është i lidhur me një rrezik 18 për qind më të lartë të sëmundjeve të zemrës. Dy apo më shumë? 21 për qind më e lartë, madje edhe tek njerëzit që stërviten. Në vitin 2025, studiuesit treguan se marrja e lartë e saj, veçanërisht nga ushqimet ultra të përpunuara, rrit rrezikun e sëmundjeve të zemrës me 17 për qind, sëmundjen e arteries koronare me 23 për qind dhe goditjen në tru me 9 për qind”.

Yaranov tha se globalisht, ajo është e lidhur me më shumë se 1 milion raste të reja të zemrës dhe 2.2 milionë raste të reja të diabetit të tipit 2 në një vit. Ai tha se një studim i JAMA Internal Medicine zbuloi se njerëzit që merrnin më shumë se 25 për qind të kalorive prej saj kishin mbi dyfishin e rrezikut të vdekjes nga sëmundjet kardiovaskulare krahasuar me ata që hanin më pak se 10 për qind.

Ai tha: “Ajo nxit inflamacionin, rrit presionin e gjakut, përkeqëson kolesterolin dhe prish kontrollin e glukozës, një goditje e dyfishtë për zemrën dhe pankreasin”.

Mjeku shtoi se shumica e njerëzve hanë shumë më tepër sesa marrja e rekomanduar ditore prej më pak se 6 lugë çaji në ditë për gratë dhe 9 lugë çaji në ditë, dy deri në tre herë më shumë në shumicën e rasteve.

Tutje ai tha: “Kontrolloni etiketat tuaja. Kufizojeni. Mbroni zemrën dhe sheqerin tuaj në gjak. Jo kolesteroli, kjo gjë dëmton zemrën tuaj në heshtje”.

Fondacioni Britanik i Zemrës rekomandon që të rriturit të kufizojnë sheqernat e lira (sheqernat e shtuara në ushqim dhe pije, dhe ato që gjenden natyrshëm në mjaltë, shurupe dhe lëngje frutash) në jo më shumë se 30 gram në ditë për të zvogëluar rrezikun e shtimit në peshë dhe sëmundjeve të zemrës dhe qarkullimit të gjakut.