Ylli i kombëtares së Kosovës, Edon Zhegrova, ka reaguar në mënyrë simbolike ndaj njoftimit të Amir Rrahmanit për largimin nga kombëtarja.
Zhegrova i ka bërë “like” postimit të Rrahmanit në “Instagram”, përmes të cilit ish-kapiteni i Kosovës njoftoi se nuk do të jetë më pjesë e kombëtares përderisa Federata e Futbollit të Kosovës drejtohet nga udhëheqja aktuale.
Rrahmani, i cili për shtatë vjet e mbajti shiritin e kapitenit, bëri të ditur se vendimi i tij lidhet pikërisht me drejtuesit aktualë të FFK-së.
Pëlqimi i Zhegrovës merr vëmendje të veçantë për shkak të raporteve të tij të mëparshme me FFK-në.
Në shtator të vitit 2024, Zhegrova ishte përjashtuar nga grumbullimi i Kosovës së bashku me Arijanet Muriqin dhe Florent Muslijën, për shkak të shkeljes së rregullores së ekipit kombëtar, sipas njoftimit të atëhershëm të FFK-së.
Në atë kohë, në media u raportua se tre futbollistët kishin dalë natën nga kampi i Kosovës në Prishtinë.
Zhegrova i kishte mohuar këto raportime, duke deklaruar se lajmet ishin “të pavërteta dhe pa fakte” dhe se do të fliste në fushë.
Tash, dy vjet më vonë, Zhegrova ka zgjedhur ta pëlqejë publikisht postimin e Rrahmanit, në të cilin kapiteni i deriatëhershëm njoftoi largimin e tij nga kombëtarja.
Ky veprim i Zhegrovës ka ngjallur interes, sidomos duke pasur parasysh historinë e tij të mëparshme me drejtuesit e futbollit kosovar.
