UEFA ka reaguar me një deklaratë të fortë pas raportimeve se presidenti i FIFA-s, Gianni Infantino, po planifikon të shesë pjesë të të drejtave komerciale të Kupës së Botës tek investitorë privatë.
Në deklaratën e saj, UEFA e cilëson këtë nismë si një veprim që “kalon një vijë që institucionet drejtuese të futbollit nuk duhet ta kalojnë kurrë”, duke theksuar se e konsideron çështjen jashtëzakonisht serioze.
“Edhe çdo Federatë Kombëtare e Futbollit duhet ta marrë këtë me seriozitet. Po ashtu edhe të gjithë aktorët e futbollit – ligat, klubet, lojtarët, tifozët, qeveritë dhe kushdo që kujdeset për të ardhmen e këtij sporti”, thuhet në reagimin e UEFA-s.
Organizata europiane shpreh shqetësimin se futbolli nuk mund të trajtohet si një aset tregtar, sidomos në mungesë të transparencës mbi përfituesit financiarë të një marrëveshjeje të tillë.
“Shpirti dhe qeverisja e futbollit nuk janë asete për t’u tregtuar – veçanërisht kur nuk ka asnjë transparencë se kush përfiton financiarisht. Askush prej nesh nuk është pronar i futbollit. Ai nuk është i FIFA-s për t’u shitur”, përfundon deklarata.
Reagimi i UEFA-s vjen në një kohë kur raportimet mbi planin e Infantinos kanë nxitur debat të gjerë në botën e futbollit, ndërsa FIFA ende nuk ka dhënë një përgjigje zyrtare lidhur me pretendimet për shitjen e aksioneve të Kupës së Botës tek investitorë privatë.
