Rikthehet Superliga e Kosovës – dy duele të zjarrta në xhiron e 32-të

Albi Mall Superliga e Kosovës rikthehet sot (e shtunë) me xhiron e 32-të, ku sipas planprogramit do të luhen dy ndeshje.

Kampioni aktual, Drita, do të luajë në udhëtim ndaj Prishtinës së Re, në një duel ku synon të mbajë distancën me Ballkanin në garën për kreun e tabelës.

Prishtina e Re, nga ana tjetër, vjen në këtë ndeshje pas tri përballjeve radhazi pa fitore dhe do të tentojë të marrë një rezultat pozitiv në luftën për mbijetesë në elitë.

Në takimin e fundit mes këtyre dy skuadrave, të zhvilluar në Gjilan, Drita kishte triumfuar me rezultat të pastër 3-0.

Në ndeshjen tjetër të ditës, Prishtina do të përballet me Malishevën në një duel që pritet të jetë tejet interesant.

Të dy skuadrat kanë objektiv kualifikimin në garat evropiane sezonin e ardhshëm, andaj përballja pritet të zhvillohet me intensitet të lartë, duke marrë parasysh edhe gjendjen në tabelë.

Malisheva aktualisht mban pozitën e tretë me 49 pikë, katër më shumë se Prishtina që renditet e katërta.

Një fitore e Prishtinës do t’i mbante fuqishëm në garë për objektivat evropiane, ndërsa një rezultat pozitiv për Malishevën do të konfirmonte formën e mirë që po kalon skuadra e drejtuar nga Bylbyl Sokoli.

Në takimin e fundit mes këtyre dy skuadrave, Malisheva kishte triumfuar me rezultat 3-0.

Ndeshja Prishtina e Re – Drita zhvillohet në ora 14:00, ndërsa Prishtina – Malisheva në ora 16:00.