Pas spekulimeve për ndarjen nga Drita, Amiri i vë vulën gjithçkaje

Jo shumë kohë më parë, rrjeti u mbush me pikëpyetje. Ku është Drita Stublla? A janë ndarë ajo dhe kapiteni i Kosovës, Amir Rrahmani?

Shkas për këto thashetheme u bë një “detaj” që në epokën digjitale konsiderohet alarmant: zhdukja e papritur e partneres së futbollistit nga rrjetet sociale. Mungesa e postimeve dhe deaktivizimi i llogarive bëri që shumëkush të aludonte se çifti i njohur i kishte dhënë fund romancës së tyre.

Por, realiteti është krejt ndryshe dhe përgjigja vjen nga Italia, plot shkëlqim dhe elegancë.

Së fundmi, Amir Rrahmani ka qenë protagonist absolut në “Gran Galà del Calcio”, mbrëmjen prestigjioze të futbollit italian, ku mbrojtësi ynë u vlerësua duke u përfshirë në formacionin e vitit pas sezonit fantastik ku u shpall kampion me Napolin.

Dhe kush ishte krah tij në këtë moment triumfi? Pikërisht ajo, Drita Stublla.

Në fotot zyrtare nga tapeti i kuq i “Associazione Italiana Calciatori”, çifti shihet duke pozuar krah për krah, të veshur “matchy” në të zeza dhe duke rrezatuar elegancë. Kjo dalje publike jo vetëm që konfirmon mbështetjen e Dritës për sukseset e Amirit, por shërben edhe si një demanti i heshtur por i fuqishëm ndaj zërave për krizë apo ndarje.

Mesa duket, vendimi i Dritës për t’u tërhequr nga vëmendja online ka qenë thjesht një zgjedhje për privatësi, ndërkohë që romanca e tyre vazhdon të jetë e fortë në jetën reale, aty ku ka vërtet rëndësi.

Kapiteni dhe partnerja e tij duken më të lumtur se kurrë!