Euforia për suksesin historik të Zvicrës në Kupën e Botës po rritet çdo ditë, ndërsa figura të njohura nga politika, sporti dhe jeta publike kanë bërë premtime të veçanta në rast se kombëtarja e Murat Yakinit arrin të shpallet kampione e botës, përcjell albinfo.ch.
Presidentja e Konfederatës Zvicerane, Karin Keller-Sutter, tha se nëse Zvicra fiton Botërorin, do të kontribuojë financiarisht për një ekip vajzash në futboll.
“Atë që mund ta bëjnë djemtë, vajzat e bëjnë prej kohësh”, u shpreh ajo.
Ylli i skive, Marco Odermatt, premtoi se do të hidhet në Liqenin e Katër Kantonëve për të festuar triumfin.
Ndërkohë, kampioni i Ninja Warrior, Joel Mattli, tha se do të organizojë një stërvitje publike në Sheshin Federal në Bernë.
Drejtori i Switzerland Tourism, Martin Nydegger, premtoi se do të ecë në këmbë nga Romanshorni deri në Gjenevë, duke përshkuar të gjithë Zvicrën.
Legjenda e mundjes zvicerane, Christian Stucki, u zotua se do të marrë pjesë në një festival tradicional të mundjes i veshur me fanellën e kombëtares.
Edhe politika nuk mbeti pas. Kryetari i Partisë së Qendrës, Philipp Matthias Bregy, tha se do t’i lyejë flokët biondë, siç kishte bërë në vitin 1999.
Nga ana tjetër, figura e njohur e jetës mondane Vera Dillier premtoi se do ta ftojë të gjithë ekipin kombëtar, së bashku me trajnerin Murat Yakin dhe partneret e tyre, në një darkë festive në një restorant.
Ndërsa drejtori i kompanisë turistike Globetrotter, André Lüthi, tha se do të vrapojë 125 kilometra nga Berna deri në Aeroportin e Cyrihut me fanellën e Zvicrës dhe këpucë futbolli, duke mbledhur donacione për bamirësi.
Edhe bashkëkryetarja e FDP-së, Susanne Vincenz-Stauffacher, premtoi se në fjalimet e saj të 1 Gushtit do të mbajë një heshtë ceremoniale tradicionale, nëse Zvicra arrin të ngrejë trofeun e Kupës së Botës.
Kombëtarja zvicerane ndodhet në një moment historik dhe besimi për një sukses të madh ka bërë që shumë figura publike të japin premtime simbolike, duke treguar entuziazmin që ka përfshirë të gjithë vendin./Albinfo.ch
