Babai i Jordan Henderson zbulon shkallën tronditëse të lëndimit: E ka shkatërruar plotësisht parakrahun

Babai i Jordan Henderson, Brian Henderson, ka zbuluar detaje të reja mbi dëmtimin e rëndë në krah që pësoi djali i tij pas fitores 3-2 të Anglisë ndaj Meksikës në 1/8 e finales së Kupës së Botës.

Henderson ishte rezervist i papërdorur në ndeshjen e zhvilluar në Mexico City, ku Anglia luajti 47 minutat e fundit, përfshirë kohën shtesë, me 10 lojtarë pasi Jarell Quansah u ndëshkua me karton të kuq direkt.

Mesfushori i Brentfordit arriti gjithsesi të ndëshkohej me karton të verdhë pas një përplasjeje pranë vijës anësore.

Megjithatë, incidenti më i rëndë ndodhi pas përfundimit të ndeshjes. Teksa Anglia po festonte kualifikimin me tifozët, Henderson tentoi të kapërcente tabelat reklamuese për t’iu bashkuar bashkëlojtarëve. Gjatë momentit të kalimit ai humbi ekuilibrin dhe u rrëzua, duke rënë direkt mbi krah.

Mesfushori mori menjëherë ndihmën e stafit mjekësor, ndërsa lojtarët dhe anëtarët e stafit teknik u mblodhën pranë tij. Atij iu dha oksigjen në fushë përpara se të transportohej me barrelë drejt një spitali në Mexico City.

Trajneri i Anglisë, Thomas Tuchel, e përshkroi lëndimin si “shumë, shumë serioz”, ndërsa më vonë u konfirmua se Henderson do t’i nënshtrohej një operacioni për një frakturë në kyçin e dorës, dëmtim që i jep fund pjesëmarrjes së tij në Kupën e Botës.

Vetë Henderson reagoi në rrjetet sociale pas lëndimit, edhe pse nuk e përmendi drejtpërdrejt incidentin me tabelat reklamuese.

“Një natë që do ta kujtoj përgjithmonë! Çfarë paraqitjeje e jashtëzakonshme përballë të gjitha sfidave. Jam shumë krenar që jam pjesë e kësaj skuadre të veçantë.

Faleminderit për gjithë mbështetjen. Të shtunën na pret një tjetër sfidë e madhe”, shkroi ai.

Në komentet e postimit, Henderson mori mesazhe mbështetjeje nga bashkëlojtarët e Anglisë, Marcus Rashford, Jude Bellingham, Declan Rice, Anthony Gordon dhe Elliot Anderson.

Ende nuk dihet nëse 36-vjeçari do të rikthehet në Angli për trajtim apo do të vazhdojë të qëndrojë me pjesën tjetër të skuadrës gjatë turneut.

Ndërkohë, babai i tij, Brian Henderson, ka zbuluar shkallën e vërtetë të dëmtimit.

Në një intervistë për “Daily Mail”, ai tha se Jordan “e ka shkatërruar plotësisht” parakrahun e majtë dhe se operacioni do të kryhet nga një kirurg me përvojë në trajtimin e dëmtimeve të ngjashme te lojtarët e NFL-së.

“Në fillim mendova se thjesht ishte rrëzuar… ndoshta kishte gërvishtur kyçin e dorës”, tha ai.

“Nuk e kisha idenë që ishte aq serioze derisa po intervistonin Harry Kane dhe pashë një barrelë që kaloi pranë me Jordanin mbi të. E pashë që kishte maskë oksigjeni.

Qëndrova zgjuar gjithë natën duke pritur lajme”, shtoi Brian Henderson.

Sipas raportimeve, Thomas Tuchel pritet t’u japë udhëzime të gjithë futbollistëve të Anglisë që të mos kapërcejnë më tabelat reklamuese gjatë festimeve, për të shmangur përsëritjen e incidenteve të tilla.

Pas fitores ndaj Meksikës, Tuchel deklaroi edhe për “BBC Sport”:

“Ai ka dëmtuar kyçin e dorës. Ndodhet në spital, kështu që është një dëmtim mjaft serioz. Nuk përputhet aspak me atmosferën e mbrëmjes fakti që Jordan nuk është më me ne. Nuk e di ende procedurën dhe çfarë do të ndodhë.”

Sipas rregullave të FIFA-s, Henderson nuk mund të zëvendësohet në listën e Anglisë, pasi zëvendësimet për shkak dëmtimi ose arsye të tjera lejohen vetëm përpara zhvillimit të ndeshjes së parë të një kombëtareje në Kupën e Botës.