A mund të shtyhet ndeshja Angli – Argjentinë?

Gjysmëfinalja e Kupës së Botës mes Anglisë dhe Argjentinës mund të përballet me vonesa këtë mbrëmje, pasi parashikimet e motit tregojnë një mundësi të lartë për stuhi me rrufe në Atlanta, Georgia.

Skuadra e Thomas Tuchelit synon të bëhet vetëm brezi i dytë i futbollistëve anglezë që arrin në finalen e Kupës së Botës, kur të përballet me kampionen në fuqi dhe fituesen tri herë të turneut, Argjentinën, në stadiumin Atlanta Stadium, i njohur më parë si “Mercedes-Benz Stadium”.

Ky impiant modern, që është shtëpia e ekipit të NFL-së Atlanta Falcons dhe klubit të MLS-së Atlanta United, është i pajisur me një çati të lëvizshme, e cila krijon iluzionin optik të tetë petaleve që hapen dhe mbyllen.

Kur kushtet atmosferike janë të pafavorshme, çatia përdoret rregullisht. Stadiumi gjithashtu ka sistem të avancuar klimatizimi, i cili shpërndan ajër të freskët në tribunë dhe mbi fushën e lojës.

Megjithëse çatia dhe klimatizimi do të ndihmojnë për të përballuar temperaturat që pritet të arrijnë deri në 29 gradë Celsius në kohën e ndeshjes, rregullat për stuhitë me rrufe mbeten të njëjta dhe kanë ndikuar edhe në ndeshje të tjera të këtij Botërori.

Sipas rregulloreve të FIFA-s, të bazuara në udhëzimet e autoriteteve lokale dhe Administratës Kombëtare për Oqeanet dhe Atmosferën (NOAA), një ndeshje duhet të ndërpritet ose të shtyhet nëse rrufeja godet brenda një rrezeje prej tetë miljesh (rreth 13 kilometrash) nga stadiumi. Në këto raste, tifozët largohen nga vendet e tyre, ndërsa futbollistët duhet të lënë fushën dhe të strehohen.

Para rifillimit të ndeshjes, ekipet lejohen të kryejnë një nxehje 15-minutëshe, ndërsa loja mund të vazhdojë vetëm pasi të kenë kaluar të paktën 30 minuta pa asnjë rrufe në zonë.

Disa skuadra janë përballur tashmë me vonesa ose ndërprerje gjatë këtij Botërori, përfshirë edhe Anglinë, ndeshja e së cilës ndaj Meksikës në fazën e 1/8 së finales u shty për një orë për shkak të motit.

Sipas “AccuWeather”, ekziston një probabilitet prej 55 për qind për reshje gjatë pasdites në Atlanta, me parashikimin që thotë: “Periudha me diell, të shoqëruara me stuhi të izoluara; mot i lagësht.”

Nëse stuhitë me rrufe ndodhin brenda rrezes së përcaktuar nga rregulloret, zyrtarët nuk do të kenë zgjidhje tjetër përveçse të ndalojnë ose shtyjnë ndeshjen.

Megjithatë, pavarësisht shqetësimeve për motin, një zëdhënës deklaroi të mërkurën në mëngjes: “Meqenëse stadiumi është i mbuluar, ndeshja nuk varet nga kushtet atmosferike dhe do të zhvillohet sipas planit. Jo, nuk do të ketë vonesë. Ndeshja do të nisë në orarin e parashikuar, pavarësisht motit. Ne do të bëjmë gjithçka që është e mundur për të garantuar sigurinë e tifozëve, por kjo nuk do të ndikojë në fillimin e ndeshjes edhe nëse disa tifozë janë ende duke hyrë në stadium ose vonohen për shkak të motit. Çatia e stadiumit na lejon ta zhvillojmë ndeshjen në kohë, pavarësisht kushteve atmosferike”.

Fituesi i kësaj gjysmëfinaleje do të përballet me Spanjën në finalen e Kupës së Botës, e cila do të zhvillohet të dielën (19 korrik) në “MetLife Stadium”, në New York/New Jersey