Vijon protesta në Tiranë, hyn në ditën 46

Protestuesit janë mbledhur për të 46-ën ditë radhazi në Tiranë, duke vijuar tubimet e tyre me kërkesën për largimin e Qeverisë dhe të gjithë klasës politike në vend.

Tubimi nisi në sheshin “Skënderbej”, ku pjesëmarrësit u mblodhën me flamuj kombëtarë dhe pankarta, përpara se të marshonin përgjatë bulevardit “Dëshmorët e Kombit” drejt godinës së Kryeministrisë.

Gjatë marshimit u dëgjuan thirrje si “Rama në burg”, “Berisha në burg” dhe “Balluku në burg”, ndërsa protestuesit kërkuan ndryshime politike dhe mbajtën fjalime para selisë së Qeverisë, edhe pse më të paktë në numër se ditët e shkuara.

Gjatë tubimit foli edhe aktivistja Luçiana Kokaj, një prej organizatoreve të protestës, e cila deklaroi se protesta ka arritur disa nga objektivat e saj.

Sipas Kokajt, protestat kanë ndikuar që Komisionerja Evropiane për Zgjerimin, Marta Kos, t’i kërkojë Qeverisë shqiptare të marrë në shqyrtim disa nga kërkesat e protestuesve.

“Protesta i ka arritur shumë nga qëllimet e saj. Anulimi i ligjit 21/24 do të jetë fitorja jonë e parë, por beteja jonë do të përfundojë vetëm kur këta të largohen”, u shpreh ajo.

Protesta vijoi me fjalime dhe thirrje para Kryeministrisë, ndërsa organizatorët kanë paralajmëruar vazhdimin e tubimeve edhe në ditët në vijim.