Turqia zbulon kërkesat e Rusisë për paqe në Ukrainë

Ministri i Jashtëm i Turqisë, Hakan Fidan, ka deklaruar se Rusia ka filluar të zbusë kërkesat e saj territoriale ndaj Ukrainës, në kuadër të bisedimeve për një marrëveshje të mundshme paqeje.

Sipas tij, Moska nuk po këmbëngul më për kontrollin e plotë mbi katër rajonet – Donetsk, Luhansk, Kherson dhe Zaporizhzhia – siç kishte bërë në fillim të luftës.

Tani, sipas Fidanit, Rusia është e gatshme të pranojë vijën aktuale të frontit si kufi të mundshëm, përveç një pjese të mbetur të rajonit të Donetskut, për të cilën vazhdon të kërkojë kontrollin. Kjo pjesë përbën rreth 25–30% të territorit të rajonit, i cili aktualisht ndodhet ende nën kontrollin ukrainas.

Kievi, nga ana tjetër, ka refuzuar çdo ide që përfshin dorëzimin e territoreve si pjesë të një marrëveshjeje paqeje. Në anën tjetër, presidenti amerikan, Donald Trump, ka sugjeruar që palët mund të arrijnë paqe përmes një shkëmbimi territoresh – ide që nuk ka gjetur përkrahje në Ukrainë.

Turqia ka luajtur më parë rolin e ndërmjetësit mes dy vendeve, duke organizuar takime mes zyrtarëve rusë dhe ukrainas, por pa rezultate konkrete deri tani.