Presidenti i SHBA-së, Donald Trump, tha sot se Amerika është në një luftë tregtare me Kinën. Gazetarët në Shtëpinë e Bardhë e pyetën nëse një luftë tregtare me Kinën ishte e afërt. “Ne jemi tashmë në një luftë tregtare”, tha Trump.
Kujtojmë se të premten, Trump njoftoi futjen e tarifave shtesë prej 100% për importet nga Kina, duke akuzuar Pekinin se ka mbajtur një “qëndrim jashtëzakonisht agresiv” në marrëdhëniet tregtare. Në një postim në rrjetin e tij social Truth Social, Trump tha se Kina i kishte dërguar një “letër jashtëzakonisht armiqësore botës” dhe kishte vendosur “kontrolle masive të eksportit për pothuajse çdo produkt që prodhon”.
Trump paralajmëroi se tarifat e reja do të hynin në fuqi më 1 nëntor dhe njoftoi se SHBA-të do të vendosnin gjithashtu kontrolle të eksportit të softuerëve të tyre kryesorë në Kinë.
“Është e pamundur të besohet se Kina do të ndërmerrte një veprim të tillë, por ata e bënë” “Bazuar në faktin se Kina ka marrë këtë qëndrim të paprecedentë dhe duke folur vetëm për Shtetet e Bashkuara dhe jo për kombet e tjera që janë prekur në mënyrë të ngjashme, duke filluar nga 1 nëntori 2025 (ose më herët, varësisht nga veprimet ose ndryshimet e mëtejshme të ndërmarra nga Kina), Shtetet e Bashkuara do të vendosin një tarifë 100% ndaj Kinës, përveç çdo tarife që po paguan aktualisht”, shkroi Trump.
“Është e pamundur të besohet se Kina do të ndërmerrte një veprim të tillë, por ata e bënë dhe pjesa tjetër është histori”, shtoi ai.
Më parë, Trump përdori mediat sociale për të sulmuar udhëheqësin kinez Xi Jinping për përpjekjet në rritje të Kinës për të vendosur kontrolle të eksportit mbi mineralet e rralla kryesore. Ai kërcënoi me kundërmasa ekonomike dhe tha se nuk shihte më asnjë arsye për t’u takuar me Xi gjatë një vizite të planifikuar në rajon më vonë këtë muaj.
