Tragjedi në Teksas: 9-vjeçarja humb jetën nga i nxehti, nëna e la të mbyllur në veturë për 8 orë

Një ngjarje e rëndë ka tronditur opinionin publik në Shtetet e Bashkuara, ku një vajzë 9-vjeçare ka humbur jetën tragjikisht, pasi u la e mbyllur në makinë nga nëna e saj, në vapën përvëluese të Teksasit, ndërsa ajo shkoi në punë.

Ngjarja ndodhi të martën, më 1 korrik, kur autoritetet morën një telefonatë urgjente për një fëmijë të pandjeshëm brenda një makine të bardhë, që ndodhej në parkingun e një fabrike në Harris County. Vajza u dërgua menjëherë në një spital lokal, ku mjekët konstatuan vdekjen e saj, sipas njoftimit të Zyrës së Sherifit.

“Jam jashtëzakonisht i mërzitur dhe i zhgënjyer që një vajzë e vogël 9-vjeçare dhe e bukur humbi jetën pa asnjë faj të sajin”, deklaroi Sherifi Ed Gonzalez në një konferencë për media. “Nuk ka kurrë justifikim për të lënë një fëmijë pa mbikëqyrje”, shtoi ai.

Nëna 36-vjeçare dyshohet se e la vajzën në makinë gjatë turnit të saj të punës, i cili zgjaste rreth 8 orë. Ajo thuhet se i kishte lënë dritaret pjesërisht të hapura dhe kishte vendosur ujë brenda automjetit, por kjo nuk ka mjaftuar për të shmangur tragjedinë.

Autoritetet thanë se nuk ishte e qartë nëse vajza u kontrollua gjatë gjithë ditës apo nëse doli nga makina në një moment të caktuar. Në xhamin e përparmë kishte një tendë dielli, e cila mund t’i ketë penguar kalimtarët të shihnin vajzën e vogël brenda, tha Gonzalez. Ai vuri në dukje se temperatura jashtë ishte rreth 36 gradë Celsius.