Kryeministri britanik Sir Keir Starmer ka reaguar ndaj veprimit ushtarak të Donald Trump në Venezuelë.
Ai tha se Mbretëria e Bashkuar “nuk ishte e përfshirë në asnjë mënyrë në këtë operacion”.
“Dua fillimisht të përcaktoj faktet. Dua të flas me Presidentin Trump. Dua të flas me aleatët. Mund të jem absolutisht i qartë se ne nuk ishim të përfshirë… dhe unë gjithmonë them dhe besoj se të gjithë duhet të respektojmë të drejtën ndërkombëtare”, tha ai, shkruan The Guardian.
Në reagime të tjera nga politikanë britanikë, lideri i Liberal Demokratëve, Sir Ed Davey, tha:
“Keir Starmer duhet të dënojë veprimin e paligjshëm të Trump në Venezuelë. Maduro është një diktator brutal dhe i paligjshëm, por sulme të paligjshme si këto na bëjnë të gjithëve më pak të sigurt. Trump po u jep dritë jeshile figurave si Putin dhe Xi që të sulmojnë vende të tjera pa u ndëshkuar”.
Lideri i Reform UK, Nigel Farage, tha: “Veprimet amerikane në Venezuelë gjatë natës janë joortodokse dhe në kundërshtim me të drejtën ndërkombëtare – por nëse i bëjnë Kinën dhe Rusinë të mendojnë dy herë, mund të jenë diçka e mirë. Shpresoj që populli venezuelian tani të mund të hapë një faqe të re pa Maduron”.
Ndërsa lideri i Partisë së Gjelbër, Zack Polanski, tha: “Kryeministri dhe Sekretari i Jashtëm duhet ta dënojnë këtë sulm të paligjshëm dhe shkelje të së drejtës ndërkombëtare të të drejtave të njeriut. Pas vitesh armatimi të një gjenocidi dhe adhurimi të ‘marrëdhënies speciale’, Trump tani beson se mund të veprojë pa u ndëshkuar”.
