Policia e Shtetit ka njoftuar se ka finalizuar operacionin policor të koduar “Ndalesa”, në kuadër të goditjes së veprimtarive kriminale në fushën e narkotikëve dhe armëmbajtjes pa leje, duke sekuestruar 10 kilogramë kanabis, dy armë zjarri pistoletë, dy silenciatorë dhe municion luftarak, ndërsa në pranga ka rënë një 42-vjeçar.
Sipas njoftimit të Policisë në Facebook, 42-vjeçari u kap në flagrancë në zonën e Unazës së Madhe, në Tiranë, duke transportuar me automjet rreth 10 kilogramë lëndë të dyshuar narkotike kanabis, që dyshohet se e posedonte me qëllim shitjen.
Operacioni u zhvillua nga specialistët për Hetimin e Krimeve të Komisariatit të Policisë Nr. 4, pas informacioneve të siguruara në rrugë operative për një person që transportonte lëndë narkotike dhe posedonte sende të kundërligjshme në banesë.