Shembet një minierë ari në Sudan, humbin jetën të paktën 15 punëtorë

Të paktën 15 punëtorë kanë humbur jetën, ndërsa një tjetër është plagosur, pas shembjes së një miniere ari në veri të Sudanit, njoftoi Kompania Sudaneze e Burimeve Minerale.

Sipas autoriteteve, aksidenti ndodhi në minierën Mohamed Tawfiq, në zonën Samna të distriktit Wadi Halfa, në shtetin verior të vendit. Punëtori i plagosur është dërguar në spital për trajtim, ndërsa trupat e viktimave u janë dorëzuar familjeve pas përfundimit të procedurave përkatëse.

Kompania bëri të ditur se ekipet e emergjencës dhe të shpëtimit mbërritën menjëherë në vendin e ngjarjes dhe bashkëpunuan me autoritetet lokale për operacionet e kërkim-shpëtimit.

Sipas hetimeve paraprake, minatorët kishin hyrë në galerinë e minierës edhe pse ajo ishte mbyllur më herët nga Departamenti i Mjedisit dhe Sigurisë, pasi ekspertët kishin konstatuar se objekti paraqiste rrezik të lartë shembjeje. Autoritetet kishin vendosur ndalim të qartë për hyrjen në minierë, por këto udhëzime nuk u respektuan.

Pas aksidentit, kompania ka dërguar një ekip teknik për të hetuar rrethanat e ngjarjes, për të vlerësuar zbatimin e standardeve të sigurisë dhe për të propozuar masa shtesë parandaluese.

Minierat artizanale të arit përbëjnë një sektor jetik për ekonominë sudaneze, duke punësuar mbi dy milionë persona dhe duke siguruar rreth 80% të prodhimit të përgjithshëm të arit në vend. Megjithatë, kushtet e punës në shumë prej këtyre minierave mbeten të rrezikshme, ndërsa autoritetet vazhdojnë përpjekjet për të rritur standardet e sigurisë.

Ari është bërë burimi kryesor i valutës së huaj për Sudanin që pas ndarjes së Sudanit të Jugut në vitin 2011, kur vendi humbi pjesën më të madhe të të ardhurave nga nafta.