Rusia bëhet shteti i parë që e njeh qeverinë e talibanëve të Afganistanit

Rusia është bërë shteti i parë në botë që e njeh formalisht pushtetin e talibanëve në Afganistan. Ministri i Jashtëm i Afganistanit, Amir Khan Muttaqi, e quajti këtë vendim “të guximshëm”.

Ai u takua me ambasadorin rus në Afganistan, Dmitry Zhirnov, të enjten në Kabul, ku rusi zyrtarisht e përçoi vendimin e vendit të tij për ta njohur Emiratin Islamik të Afganistanit, raporton televizioni BBC.

Muttaqi tha se kjo është “një fazë e re e marrëdhënieve pozitive, respektit të ndërsjellë dhe angazhimit konstruktiv” dhe se ky ndryshim do të shërbejë “si shembull” për shtetet e tjera.

Talibanët kanë kërkuar njohje ndërkombëtare dhe investime që nga rikthimi në pushtet në gushtin e vitit 2021, pavarësisht nga raportimet për shtimin e shkeljeve të të drejtave të njeriut.

“Ne besojmë se akti i njohjes zyrtare të qeverisë së Emiratit Islamik të Afganistanit do t’i japë një shtysë zhvillimit të bashkëpunimit produktiv mes vendeve tona” – tha në një deklaratë Ministria e Jashtme e Rusisë.

Rusia ishte një nga shtetet e pakta që nuk i kishin mbyllur ambasadat në Afganistan më 2021 dhe tha në rrjetin “Telegram” se “zgjerimi i dialogut me Kabulin” është jetik në aspektet e sigurisë rajonale dhe zhvillimit ekonomik.

Federata Ruse ishte gjithashtu shteti i parë që nënshkroi një marrëveshje ndërkombëtare ekonomike me talibanët në vitin 2022. Sipas paktit, palët ishin pajtuar për furnizimin e Afganistanit me naftë, gaz dhe grurë.