Sot është Dita e Alfabetit shqip, i cili u unifikua 117 vjet më parë në Kongresin e Manastirit.
Kryeministri shqiptar, Edi Rama, ka uruar Ditën e Alfabetit, duke thënë se kjo ditë e vulosi shqipen si një “një univers identiteti, mendimi e kulturash”.
“Gëzuar Ditën e Alfabetit, ditën që vulosi shqipen jo vetëm si kod gjuhësor, por si një univers identiteti, mendimi e kulturash në rrugën drejt së ardhmes ku fjala shqipe vazhdon të ndërtojë historinë e një kombi që shpirtin e ka te gjuha”, shkroi Rama.
Kongresi i Manastirit u zhvillua mes 14-22 nëntorit të vitit 1908. Në të morën pjesë 50 delegatë nga 26 qytete të ndryshme, klube dhe shoqata. Në këtë Kongres u miratua vendimi që të pranohet alfabeti latin me disa ndryshime të shkronjave duke i adaptuar ato për gjuhën shqipe.
