Putin thotë se teksti ShBA-Ukrainë mund të shërbejë për një marrëveshje paqeje në të ardhmen

Presidenti rus Vladimir Putin tha të enjten se skicat e një draft-plani paqeje të diskutuar nga Shtetet e Bashkuara dhe Ukraina mund të bëhen baza e marrëveshjeve të ardhshme për t’i dhënë fund konfliktit në Ukrainë, por nëse jo, atëherë Rusia do të vazhdojë të luftojë.

“Në përgjithësi, ne jemi dakord që kjo mund të jetë baza për marrëveshjet e ardhshme”, tha Putin, duke shtuar se varianti i planit të diskutuar nga Shtetet e Bashkuara dhe Ukraina në Gjenevë i ishte kaluar Rusisë.

Putin tha se Shtetet e Bashkuara po e merrnin parasysh qëndrimin e Rusisë, por se disa gjëra ende duhen diskutuar. Ai tha se nëse Evropa donte një premtim për të mos e sulmuar, atëherë Rusia ishte e gatshme ta jepte një premtim të tillë.

Rusisë, tha Putin, ende po i thuhej se duhet të ndërpriste luftimet.

“Trupat ukrainase duhet të tërhiqen nga territoret që mbajnë dhe pastaj luftimet do të ndërpriten. Nëse nuk largohen, atëherë ne do ta arrijmë këtë me mjete të armatosura. Kaq është,” tha Putin. Forcat ruse, tha ai, po përparonin në Ukrainë me një ritëm më të shpejtë.

Putin tha se e konsideronte udhëheqjen ukrainase të paligjshme dhe kështu ishte ligjërisht e pamundur të nënshkruhej një marrëveshje me Ukrainën, kështu që ishte e rëndësishme të sigurohej që çdo marrëveshje të njihej nga bashkësia ndërkombëtare dhe që bashkësia ndërkombëtare të njihte fitimet ruse në Ukrainë, shkruan Reuters