Kokaina në Frakull të Shqipërisë, ekstradohet nga Kolumbia kimisti i dënuar me 14 vjet burg

Ekstradohet në Shqipëri kimisti kolumbian i drogës në Frakull, raporton A2 CNN. Shtetasi kolumbian Sammir Rosales Rodriguez është ekstraduar nga Kolumbia në Shqipëri, ku do të vuajë dënimin me 14 vite burg të dhënë nga Gjykata e Posaçme, pas hetimeve të zhvilluara nga SPAK.

Ai u arrestua për llogari të SPAK-ut në Kolumbi në shtator 2025.

Më 30 qershor të këtij viti, Gjykata e Posaçme vendosi të dënojë me 14 vite heqje lirie kolumbianin 49-vjeçar, i akuzuar si kimisti i grupit kriminal që trafikoi nga Amerika Latine në Shqipëri kokainë të tretur në pleh organik artificial, u shpall fajtor për veprat penale të “trafikimit të lëndëve narkotike” dhe “grupit të strukturuar kriminal”.

Samir Rosales Rodrigues u identifikua nga SPAK-u si një nga anëtarët e grupit kriminal të përfshirë në trafikimin e rreth 485 kilogramëve kokainë kolumbiane. Sasia e drogës, e tretur në pleh organik artificial, u nis nga porti i Buenaventurës në Kolumbi, me transit në portin e Pireut në Athinë e më pas në portin e Tivarit, në Mal të Zi. Nga ky port, ngarkesa u transportua me rrugë tokësore drejt Frakullës së Madhe, në Fier, shkruan A2CNN

Sipas SPAK-ut, Rodrigues ka lëvizur paralelisht me ngarkesën nga Kolumbia në Greqi, Mal të Zi dhe Shqipëri, duke ngritur dyshime se ishte shoqëruesi i saj.

Dy javë para se ndaj tij të lëshohej një urdhër-arrest, në kuadër të një veprimi hetimor të SPAK-ut, një patrullë policie ndaloi automjetin ku ai u identifikua me pasaportën e tij kolumbiane, me identitetin e vërtetë. SPAK-u nuk procedoi me arrestimin e tij për të mos dekonspiruar hetimin, por pas lëshimit të urdhër-arrestit ai nuk u gjet më nga policia.

Dhjetë prej të bashkëpandehurve shqiptarë të Rodrigues janë gjykuar veçmas në dy shkallët e Gjykatës së Posaçme, ku janë shpallur fajtorë dhe janë dënuar me masa që variojnë nga 8 deri në 11 vite burg