Irani merr përsipër sulmin ndaj bazave ushtarake amerikane në Kuvajt dhe Jordani

Ushtria e Iranit thotë se ka kryer sulme ndaj objekteve ushtarake amerikane në Kuvajt dhe Jordani, sipas mediave shtetërore.

Pretendohet se ka synuar një vend grumbullimi për ushtarët amerikanë dhe një sistem radari paralajmërues në Bazën Ajrore “Ali Al Salem” në Kuvajt, raporton Sky News.

Ushtria iraniane tha gjithashtu se kishte në shënjestër sistemet e komunikimit dhe rezervuarët e ruajtjes së karburantit në bazën Azraq në Jordani.

Kjo vjen pasi Shtetet e Bashkuara të Amerikës nisën dy valë sulmesh ndaj Iranit në më pak se 24 orë të mërkurën.

Komanda Qendrore e ShBA-së tha se sulmet kishin goditur “qendrat e komandës iraniane, vendet e mbrojtjes ajrore, kapacitetet e raketave dhe dronëve, si dhe objektet e mbikëqyrjes bregdetare”.