Në Asamblenë e Përgjithshme të Kombeve të Bashkuara, presidenti amerikan Donald Trump nisi fjalimin e tij me një incident, pasi teleprompteri nuk funksionoi.
“Nuk e kam problem të flas pa teleprompter, sepse ai nuk punon, kështu flas më shumë nga zemra”, tha Trump, duke shkaktuar të qeshura në sallë. Por nga ç’mund të dukej, presidenti ishte serioz dhe paralajmëroi se për personin që menaxhonte pajisjen do të kishte pasoja.
Pak më vonë, Trump shpërtheu në rrjetet sociale, duke folur për një “sabotazh të trefishtë” gjatë vizitës së tij në Nju Jork. Ai iu referua tre episodeve: ndalimit të papritur të një shkalle lëvizëse, keqfunksionimit të teleprompterit dhe një problemi me audion në sallë.
“Një turp i vërtetë ndodhi në OKB. Jo një, jo dy, por tre incidente të këqija. Nuk ishte një rastësi, por një sabotazh i trefishtë. Së pari, shkallët lëvizëse që ngjiteshin në podium u ndalën menjëherë. Unë dhe Melania ishim me fat që nuk pësuam lëndime. Siç u vu re nga një postim në ‘The London Times’, shkruhej se punonjësit e OKB-së ‘bënë shaka për fikjen e një shkalle lëvizëse’. Njerëzit që e bënë këtë duhet të arrestohen. Pastaj, ndërsa qëndroja para një turme televizive me miliona njerëz në të gjithë botën, teleprompteri im nuk funksionoi. Dhe së treti, pasi mbajta fjalimin, më thanë se zëri ishte plotësisht i fikur në Auditor. Liderët nuk kishin dëgjuar asgjë. Ata duhet të kenë turp nga vetja.”
Zyrtarët e OKB-së reaguan shpejt. Ata sqaruan se audio ishte projektuar vetëm për përkthim, se teleprompteri ishte përgjegjësi e delegacionit amerikan, ndërsa shkalla lëvizëse ishte ndalur pasi kameramani i Trump e kishte përdorur gabimisht.
