Analisti britanik, Eric Gordy ka vlerësuar se ishte e pashmangshme dështimi i përpjekjeve për të formuar qeverinë pas zgjedhjeve të fundit, duke theksuar se Vetëvendosje ka mbetur e pakompromis dhe jo atraktive për partnerë të tjerë koalicioni.
Ai për GazetaBlic tha se parashikon se zgjedhjet e reja mund të rezultojnë me Vetëvendosje si partia më e madhe, por që formimi i shumicës pa ta do të çonte në një qeveri legjitime por të paqëndrueshme.
“Mendoj se ishte e pashmangshme që përpjekja për të formuar një qeveri mbi bazën e zgjedhjeve të fundit të dështonte, dhe përfundimisht kjo ka ndodhur. Kurti thjesht tentoi të qëndrojë në detyrë më gjatë se sa zgjat mandati i tij. Arsyeja kryesore e dështimit të negociatave ishte se partia e tij ishte bërë e pakompromis dhe nuk ishte atraktive për partitë e tjera si partner koalicioni”, tha Gordy.Sipas tij, nëse VV’ja hyn në një koalicion, do të duhet të moderojë pozicionet dhe të tregojë gatishmëri për ndarjen e pushtetit, duke krijuar mundësinë për një qeveri më stabile.
“Tani do të ketë zgjedhje të reja, ku rezultati i mundshëm është që Vetëvendosje të mbetet ende partia më e madhe. Ajo që nuk dihet është nëse partitë e tjera do të jenë në gjendje të formojnë një shumicë pa ta. Nëse e bëjnë, rezultati do të jetë një qeveri legjitime, por e paqëndrueshme. Nëse Vetëvendosje e gjen veten në nevojë për të hyrë në një marrëveshje koalicioni me partitë e tjera, do të duhet të moderojë disa nga pozicionet e saj dhe të tregojë një gatishmëri më të qartë për të ndarë pushtetin. Ky rezultat nuk është shumë i mundshëm, por ekziston mundësia që të prodhojë një qeveri të qëndrueshme”, tha Gordy për GazetaBlic.
