Turqia dhe Britania e Madhe kanë nënshkruar të mërkurën një marrëveshje paraprake që i mundëson Ankarasë të operojë avionët luftarakë “Eurofighter Typhoon”, ndërkohë që Gjermania ka miratuar dorëzimin e 40 njësive të tilla, të cilat Turqia i ka kërkuar për forcimin e mbrojtjes në një rajon gjithnjë e më të pasigurt.
Si anëtare e NATO-s, Turqia po punon intensivisht për të rritur kapacitetet e saj mbrojtëse përmes zhvillimit të projekteve vendore dhe blerjeve të huaja. Krahas marrëveshjes për “Eurofighter”-ët, Ankaraja është në negociata edhe me Shtetet e Bashkuara për blerjen e 40 avionëve F-16.
Në të njëjtën kohë, Qeveria gjermane ka hapur rrugën për dorëzimin e 40 avionëve “Eurofighter Typhoon” pas miratimit nga Këshilli Federal i Sigurisë. Megjithatë, Ministria gjermane e Mbrojtjes ka refuzuar të komentojë mbi çështjen, ashtu si edhe Këshilli Federal, miratimi i të cilit kërkohet për eksportin e armëve.