Drejtuesit të një kompanie farmaceutike i bie të fikët gjatë një konference për media në Shtëpinë e Bardhë

Një incident i pazakontë ka ndodhur të enjten pasdite në Zyrën Ovale të Shtëpisë së Bardhë, gjatë një konference të presidentit amerikan Donald Trump për barnat kundër obezitetit. Një përfaqësues i kompanisë farmaceutike Novo Nordisk është rrëzuar papritur pas Trumpit, duke shkaktuar ndërprerjen e menjëhershme të transmetimit live.

Sipas raportimeve të mediave amerikane, bëhet fjalë për Gordon Findlay, drejtues në kompaninë Novo Nordisk , e cila prodhon barnat e njohura Ozempic , Rybelsus dhe Wegovy .

Në momentin e incidentit, drejtori ekzekutiv i kompanisë Eli Lilly , David Ricks, u dëgjua duke pyetur “A je mirë, Gordon?”, ndërsa zyrtarët kërkuan që gazetarët të largoheshin nga salla. Trump u ngrit menjëherë nga tavolina e tij, ndërsa Dr. Mehmet Oz nxitoi për t’i dhënë ndihmë përfaqësuesit që kishte humbur ndjenjat.

Sekretarja për shtyp e Shtëpisë së Bardhë, Karoline Leavitt, konfirmoi më vonë se personi është jashtë rrezikut për jetë.

“Gjatë njoftimit për iniciativën ‘Most Favored Nations’, një përfaqësues i një kompanie farmaceutike ra të fikët. Njësia mjekësore e Shtëpisë së Bardhë reagoi menjëherë dhe gjendja e tij është e mirë. Konferenca për shtyp do të vazhdojë së shpejti,” tha ajo.