Një person i armatosur ka hapur zjarr në një zyrë të sigurimeve shoqërore dhe në një gjykatë në qendër të Athinës të martën, duke plagosur disa persona, thanë autoritetet greke.
Një operacion policor është duke u zhvilluar për të gjetur personin e armatosur, i cili sipas mediave greke ishte një burrë 89-vjeçar.
Policia tha se një burrë i armatosur me një pushkë gjahu fillimisht hapi zjarr në zyrën e Fondit Kombëtar të Sigurimeve Shoqërore (EFKA) në qendër të kryeqytetit grek, duke plagosur një punonjës.
Oficerët e policisë që mbërritën në vendngjarje, ku trajtuan burrin e plagosur, por personi i armatosur u largua nga vendi i ngjarjes.
I njëjti burrë dyshohej se më vonë hapi zjarr në katin përdhes të ndërtesës së Gjykatës së Apelit në Athinë, ku mbetën disa persona të plagosur, tha policia, duke shtuar se autoritetet kishin gjetur pushkën.
Pamjet nga transmetuesi shtetëror tregojnë ekipet e ambulancës duke transportuar të paktën tre persona nga gjykata në ambulanca.
Motivi i të shtënave është i paqartë. Raportohet se personi i armatosur kishte hedhur zarfa me dokumente në dysheme pas të shtënave në gjykatë, duke thënë se ato ishin arsyet e veprimeve të tij, shkruan Euronews.al.
Dhuna me armë është relativisht e rrallë në Greqi, ku pronësia e armëve të zjarrit lejohet, por rregullohet rreptësisht.
