Departamenti amerikan i Thesarit i heq emërtimin si “terrorist” presidentit sirian

Departamenti amerikan i Thesarit ka njoftuar sot heqjen e emërtimit si “Terrorist Global i Përcaktuar Posaçërisht” (Specially Designated Global Terrorist – SDGT) ndaj presidentit sirian Ahmad al-Sharaa dhe ministrit të Brendshëm, Anas Khattab, vetëm një ditë pas vendimit të ngjashëm të marrë nga Këshilli i Sigurimit i Kombeve të Bashkuara.

Ky zhvillim vjen pak ditë para vizitës historike të presidentit al-Sharaa në Shtëpinë e Bardhë më 10 nëntor, ku ai pritet të takohet me presidentin amerikan Donald Trump – takim ky që shënon vizitën e parë të një kreu sirian në Uashington që nga pavarësia e Sirisë në vitin 1946.

Sipas njoftimit të publikuar në faqen zyrtare të Zyrës për Kontrollin e Pasurive të Huaja (OFAC), Thesari amerikan ka konfirmuar heqjen e të gjitha emërtimeve që lidheshin me al-Sharaan dhe Khattabin si pjesëtarë të ish-grupit Hayat Tahrir al-Sham (HTS), organizatë që deri në korrik të vitit 2025 konsiderohej degë e al-Kaedës në Siri.

Vetëm 24 orë më parë, më 6 nëntor, Këshilli i Sigurimit i OKB-së kishte miratuar me 14 vota pro (me Kinën që abstenoi) rezolutën e propozuar nga Shtetet e Bashkuara për heqjen e sanksioneve ndaj dy zyrtarëve sirianë, duke i larguar ata nga lista e ISIL-it dhe al-Kaedës.

Ambasadori amerikan në OKB, Mike Waltz, e ka quajtur vendimin “sinjal të fortë politik se Siria ka hyrë në një epokë të re pas rrëzimit të Bashar al-Assadit”.

Abu Mohammad al-Jolani, i cili për vite me radhë drejtoi HTS-në – grup që evoluoi nga Fronti al-Nusra (dega zyrtare e al-Kaedës në Siri) – udhëhoqi forcat që rrëzuan regjimin 54-vjeçar të familjes Assad më 8 dhjetor 2024. Në maj të vitit 2013, SHBA-ja e kishte shpallur atë “Terrorist Global të Përcaktuar Posaçërisht” dhe kishte vënë një shpërblim prej 10 milionë dollarësh për kapjen e tij.

Transformimi diplomatik që çoi në këtë vendim filloi në maj 2025, kur presidenti Trump u takua me al-Sharaan në Riad, në prani të princit saudit Mohammed bin Salman, ku shpalli heqjen e plotë të sanksioneve amerikane ndaj Sirisë.

Në qershor, Trump nënshkroi urdhrin ekzekutiv për revokimin e sanksioneve, ndërsa në korrik Departamenti i Shtetit hoqi emërtimin terrorist për HTS-në.

Ministria e Jashtme siriane e ka mirëpritur vendimin e fundit të SHBA-së, duke e cilësuar si “reflektim të qëndrimit të bashkuar ndërkombëtar në mbështetje të stabilitetit, integritetit territorial dhe pavarësisë politike të Sirisë”.

Megjithatë, sanksionet më të ashpra të miratuara nga Kongresi amerikan në kuadër të Aktit Caesar të vitit 2019 mbeten ende në fuqi dhe kërkojnë votim të veçantë parlamentar për t’u hequr plotësisht.

Gjatë vizitës së tij më 10 nëntor në Uashington, pritet që al-Sharaa të nënshkruajë marrëveshje për anëtarësimin zyrtar të Sirisë në koalicionin global kundër ISIS-it, si dhe të kërkojë mbështetje amerikane për rindërtimin e vendit dhe heqjen përfundimtare të sanksioneve Caesar.