Çekia, Sllovakia dhe Tajvani evakuojnë qytetarët nga Izraeli, Gjermania s’ka ndërhy ende

Ministria e Jashtme e Çekisë njoftoi se ka dërguar një avion për të tërhequr qytetarët çekë që dëshirojnë të largohen nga Izraeli.

Ndërkohë, disa qytetarë të tjerë çekë do të udhëtojnë drejt Jordanisë me një avion të dërguar nga qeveria e Sllovakisë, për t’u kthyer më pas në vendin e tyre.

Ministria e Punëve të Jashtme të Tajvanit bëri të ditur se ka ndihmuar 14 qytetarë tajvanezë të largohen nga Izraeli me autobus drejt Jordanisë të dielën, dhe do t’i ndihmojë ata të vazhdojnë udhëtimin drejt shtëpisë. Gjithashtu, ministria konfirmoi se është në kontakt me nëntë shtetas tajvanezë që ndodhen aktualisht në Iran dhe do t’u ofrojë ndihmë nëse vendosin të largohen.

Nga ana tjetër, ambasada gjermane në Izrael u ka bërë thirrje shtetasve gjermanë që të qëndrojnë të strehuar deri në stabilizimin e situatës.

”Për sa kohë hapësira ajrore mbetet e mbyllur dhe rrugët tokësore nuk janë të sigurta, për fat të keq nuk kemi mundësi t’ju ndihmojmë me largimin”, thuhet në deklaratën e ambasadës.

Ndërkohë në Iran, Ministria e Jashtme e vendit njoftoi se rreth 120 persona, përfshirë diplomatë dhe familjet e tyre, janë evakuuar përmes Turkmenistanit. Shumica e të evakuuarve ishin shtetas të vendeve të Azisë Qendrore si Kazakistani, Kirgistani, Uzbekistani dhe Taxhikistani.

Këto zhvillime pasqyrojnë shqetësimin në rritje ndërkombëtar për sigurinë e qytetarëve të huaj në zonat e përfshira nga tensionet gjeopolitike mes Iranit dhe Izraelit.