Burri që pushoi 900 persona, tani humbi vetë vendin e punës

Vishal Garg, CEO dhe themeluesi i kompanisë fintech Better, është shkarkuar nga detyra dhe është zëvendësuar përkohësisht nga menaxheri i fondeve të investimeve, Daniel Lewis.

Garg u bë i njohur në vitin 2021 pasi pushoi nga puna rreth 900 punonjës gjatë një video-thirrjeje në Zoom, pak para Krishtlindjeve. Në atë kohë, ai tha se vendimi ishte i nevojshëm për të shmangur probleme financiare, shkruan Metro

Sipas raportimeve, bordi i kompanisë votoi unanimisht për shkarkimin e tij, duke përmendur humbje neto prej më shumë se 1.5 miliard dollarësh që nga viti 2022 dhe një rënie prej mbi 90 për qind të vlerës së aksioneve.

Garg ka thënë se ndihet i mashtruar nga vendimi dhe i ka kërkuar bordit të rikthehet në detyrë. Ai ka deklaruar se është i gatshëm të punojë për 1 dollar në vit deri në rikthimin e kompanisë në profitabilitet.

Ndërkohë, Better e ka akuzuar Garg-un në një ankesë gjyqësore se ka shkelur ligjet federale të letrave me vlerë, duke tentuar të krijojë një grup aksionarësh për ta rikthyer veten në postin e CEO-s.