Britania dhe Gjermania drejt marrëveshjes kundër migracionit të paligjshëm

Kryeministri britanik, Sir Keir Starmer, pritet të nënshkruajë sot një marrëveshje dypalëshe me kancelarin gjerman, Friedrich Merz, për të forcuar masat kundër migracionit të paligjshëm dhe rrjeteve të kontrabandës së njerëzve.

Ceremonia zyrtare e nënshkrimit do të zhvillohet në Berlin, dhe pas saj, të dy udhëheqësit do të dalin në një konferencë për media.

Marrëveshja është pjesë e përpjekjeve të përbashkëta mes dy shteteve për të frenuar aktivitetet kriminale që synojnë trafikimin e emigrantëve drejt Mbretërisë së Bashkuar.

Në dhjetor të vitit të kaluar, Gjermania shprehu gatishmërinë për ta konsideruar lehtësimin e kontrabandës së njerëzve drejt Britanisë si një vepër penale. Megjithatë, ndonëse ishte përshëndetur si hap i rëndësishëm, ligji përkatës ende nuk është prezantuar në Bundestag.

Në një deklaratë zyrtare në atë kohë, qeveria gjermane kishte thënë: “Gjermania konfirmoi qëllimin e saj për të sqaruar ligjin për të forcuar kapacitetet e zbatimit të tij kundër bandave të kontrabandës së njerëzve.”

Por sipas vëzhguesve, fjala kyçe mbetet “qëllim”, pasi nuk ekziston ende një akt ligjor që ndëshkon qartë këtë veprim, sidomos kur bëhet jashtë territorit të BE-së – përfshirë Britaninë e Madhe pas Brexit-it.

Burime nga Downing Street bëjnë të ditur se ligji i ri gjerman mund të hyjë në fuqi deri në dhjetor të këtij viti, thuajse një vit pas dakordësimit fillestar.