Ambasadori amerikan në Izrael: SHBA-ja nuk ka plane për ndërhyrje ushtarake në Iran

Ambasadori i SHBA-së në Izrael, Mike Huckabee, ka deklaruar të hënën se Shtetet e Bashkuara të Amerikës aktualisht nuk kanë plane për të ndërhyrë në Iran.

Në një intervistë për transmetuesin britanik Sky News , Huckabee ka theksuar se, ndonëse për momentin nuk ka sinjale për një angazhim ushtarak amerikan, vendimet përfundimtare do të merren nga presidenti i SHBA-së, Donald Trump, së bashku me kabinetin e tij.

“Nuk po dëgjoj asgjë për momentin që Amerika po përgatitet të angazhohet ushtarakisht”, ka thënë Huckabee.

Ai ka shtuar se protestat në Iran janë nxitur nga zemërimi i qytetarëve lidhur me kushtet e jetesës dhe mënyrën e qeverisjes.

Sipas Huckabee, presidenti Trump preferon të mos përdorë forcë ushtarake, por ka paralajmëruar se kjo qasje mund të ndryshojë nëse autoritetet iraniane vazhdojnë të vrasin protestues.

“Ai do të ndërhyjë kur të jetë e nevojshme,” ka thënë Huckabee.

Ndërkohë, aktivistët kanë bërë të ditur se protestat kanë shkaktuar vdekjen e rreth 2,000 personave.

Po ashtu, më shumë se 10,700 persona janë ndaluar gjatë dy javëve të protestave, sipas Agjencisë së Lajmeve për Aktivistët e të Drejtave të Njeriut me seli në SHBA, e cila është vlerësuar si burim i saktë edhe gjatë trazirave të mëparshme në vitet e fundit.

Për shkak të ndërprerjes së internetit në Iran, vlerësimi i përmasave reale të protestave nga jashtë vendit është bërë gjithnjë e më i vështirë.