Agjencia bërthamore e OKB-së i tërheq inspektorët nga Irani pasi ai e pezulloi bashkëpunimin

Inspektorët e Agjencisë Ndërkombëtare të Energjisë Bërthamore (IAEA) u larguan të premten nga Irani, sipas njoftimit të saj. Agjencia bëri thirrje për rinisjen e “vëzhgimit të domosdoshëm”, pasi Teherani zyrtarisht e pezulloi bashkëpunimin me të.

Pezullimi i bashkëpunimit erdhi pas luftës 12-ditore të muajit të kaluar mes Iranit dhe Izraelit, kur forcat izraelite dhe amerikane kryen sulme të pashembullta ndaj qendrave bërthamore iraniane dhe i përshkallëzuan tensionet mes Teheranit dhe IAEA-së, raporton gazeta “The Times of Israel”.

“Një ekip i inspektorëve të IAEA-së sot në mënyrë të sigurt u largua nga Irani për t’u kthyer në selinë qendrore të agjencisë në Vjenë, pasi kishin qëndruar në Teheran gjatë tërë konfliktit të fundit ushtarak” – thuhet në një shkrim të kësaj agjencie në rrjetin X.

An IAEA team of inspectors today safely departed from Iran to return to the Agency headquarters in Vienna, after staying in Tehran throughout the recent military conflict. pic.twitter.com/65YQcDL7Ik

— IAEA – International Atomic Energy Agency ⚛️ (@iaeaorg) July 4, 2025 “Drejtori i përgjithshëm i IAEA-së, Rafael Grossi, e përsëriti rëndësinë jetike të diskutimit të IAEA-së me Iranin për modalitetet e rinisjes së vëzhgimit të detyrueshëm dhe aktiviteteve të verifikimit në Iran sa më shpejt që është e mundshme” – thuhet më tej.

Irani të mërkurën zyrtarisht e pezulloi bashkëpunimin me Agjencinë Ndërkombëtare të Energjisë Bërthamore.

Më 25 qershor, një ditë pas fillimit të armëpushimit mes Izraelit dhe Iranit, deputetët iranianë votuan me shumicë dërrmuese për ta pezulluar këtë bashkëpunim.

Shtetet e Bashkuara, të cilat i kanë bërë presion Teheranit që t’i rinisë bisedimet që ishin penguar nga veprimet ushtarake të Izraelit që nisën më 13 qershor, e ka dënuar vendimin e Iranit për pezullimin e bashkëpunimit me IAEA-në, duke e quajtur të papranueshëm.