Sulmuesi i kombëtares gjermane dhe Borussia Dortmund, Karim Adeyemi, është gjobitur me 450 mijë euro nga autoritetet gjermane, pas zbulimit të armëve të ndaluara në pronësinë e tij dhe të partneres së tij, këngëtares me origjinë shqiptare Loredana Zefi.
Sipas të përditshmes gjermane Bild, ngjarja i përket rreth një viti më parë, kur policia gjeti “dy objekte të klasifikuara si armë të ndaluara” në sendet e çiftit, duke çuar në ngritjen e procedurave penale. Gjykata gjermane vendosi një gjobë të rëndë ndaj Adeyemit, e cila do të shlyhet në 60 këste prej 7,500 eurosh.
Edhe pse nuk u dha asnjë dënim me burg dhe asnjë shënim penal, ngjarja është cilësuar nga mediat vendase si një “goditje serioze për imazhin e një futbollisti të kombëtares”.
Nga ana e tij, Adeyemi nuk ka komentuar publikisht, ndërsa përmes menaxherit Jorge Mendes është dhënë sqarimi se armët nuk janë blerë prej tyre, por kanë qenë pjesë e një “mystery box” të porositur përmes TikTok — një pretendim që ligjërisht nuk ndryshon përgjegjësinë për posedim.
