Në “shtratin e zbrazur”, kompozitori Adi Hila feston sot ditëlindjen

Kompozitori dhe producenti i njohur shqiptar Adi Hila feston sot 56-vjetorin e lindjes. I lindur më 7 tetor 1970 në Vlorë, Hila është prej vitesh një nga emrat e njohur të muzikës së lehtë shqiptare, me një karrierë të shtrirë në festivale, çmime dhe bashkëpunime me artistë të njohur.

Ditët e fundit, emri i tij është përfshirë në një çështje që ka tërhequr vëmendje të madhe në media e rrjetet sociale, pas publikimit dhe shpërndarjes së videove intime ku shfaqen disa persona të njohur të artit dhe biznesit. Sipas deklarimeve të disa prej personave të përfshirë, ata nuk kanë qenë në dijeni se po filmoheshin në ambientet e studios së kompozitorit.

Hila, sipas deklarimeve të bëra pranë autoriteteve, ka pretenduar se kamerat e sigurisë në ambientet e studios janë hakuar dhe se pamjet kanë dalë në mënyrë të paautorizuar. Çështja vijon të jetë nën hetim dhe rrethanat e plota të publikimit të materialeve nuk janë bërë ende të qarta.

Në lidhje me rastin ka reaguar edhe këngëtarja Eli Fara, e cila në deklaratat e saj publike ka dënuar personin që ka shpërndarë videot. Ndërkohë, aktorja Monika Lubonja ka ndërmarrë një hap ligjor, duke ngritur padi në Gjykatën e Tiranës ndaj kompozitorit Adi Hila.

Ndërsa çështja vijon të hetohet nga autoritetet, emri i kompozitorit është në qendër të vëmendjes pikërisht në ditën kur ai feston 56-vjetorin e lindjes.