Misse i jep lamtumirën ish-bashkëshortit, zemërthyer i jep premtimin e fundit

Modelja e njohur shqiptare, Missé Beqiri, ka thyer heshtjen përmes një reagimi thellësisht prekës pas lajmit tragjik të vdekjes së ish-bashkëshortit të saj, yllit të reality show-t “TOWIE”, Jake Hall. Jake u gjet i pajetë të enjten në një vilë në Spanjë, ku sipas raportimeve të policisë, ai u zbulua në një pishinë gjaku me lëndime fatale në kokë.

Përmes llogarisë së saj në Instagram, Missé ndau kujtime familjare ku shfaqet bashkë me Jake dhe vajzën e tyre, e shoqëruar vetëm me një emoji me zemër të thyer në përshkrim. Krahas saj, modelja publikoi një letër të gjatë dhe emocionuese, duke shprehur dhimbjen e madhe që ka kapluar atë dhe vajzën e tyre. “Nuk e kisha menduar kurrë se do të më duhej ta shkruaja këtë, dhe dhimbja e hedhjes së këtyre fjalëve është e padurueshme,” shkruan ajo në fillim të dedikimit.

Në fjalët e saj, Missé e kujton Jake si një njeri me sharm dhe energji të jashtëzakonshme, që “ndriçonte çdo dhomë ku hynte”. Ajo theksoi dashurinë e tij të madhe për muzikën, shpirtin e tij krijues dhe lidhjen e fortë që kishin që në fillimet e tyre. “Unë të kam dashur që në momentin e parë që të pashë,” pranon ajo, duke u shprehur e shkatërruar për humbjen e parakohshme.

Një pjesë e rëndësishme e mesazhit i dedikohet dashurisë së tij për vajzën e tyre, River. Modelja shkruan se Jake do të shkonte “në fund të botës për të” dhe se ai ishte personi i preferuar i vajzës, babai i saj. Missé i jep një premtim solemn ish-partnerit të ndjerë: “Të premtoj se do ta mbaj River të sigurt, të dashur dhe të mbështjellë me llojin e dashurisë që ti e jepje aq pa sforcim.”

Në mbyllje, Missé përmend edhe vëllain e saj të ndjerë, Flamur “Alex” Beqiri, duke u ngushëlluar me mendimin se të dy tashmë janë bashkë. “E di që po qeshni bashkë tani,” shkruan ajo, duke theksuar se Jake do të jetojë përgjithmonë përmes vajzës së tyre.

Postimi i modeles ka marrë menjëherë qindra mesazhe ngushëllimi nga miq, ndjekës dhe figura të njohura publike, të cilët i kanë ofruar mbështetje në këtë periudhë të errët.