Aktori i famshëm ndërkombëtar, Can Yaman, ka qenë kryefjala e kësaj fundjave në Siçili, duke u pritur me një entuziazëm të madh nga publiku.
Protagonisti i shumëpritur i “Sandokan” ishte i ftuari special në “Cannolo Fest”, event i cili organizohet në Piana degli Albanesi, ose siç njihet ndryshe me krenari, Hora e Arbëreshëvet. Në këtë organizim ku nderohej ndërthurja e kulturave dhe ku vetë Can u vlerësua në skenë me çmimin “Premio Hora Skanderbeg”, mes atmosferës mikpritëse dhe qindra fansave që kishin mbushur sheshin për ta parë nga afër, biseda mori një drejtim mjaft emocional.
Teksa u pyet nga moderatorja për faktin se Piana degli Albanesi është qendra historike e komunitetit shqiptar dhe si e përjeton ai këtë lidhje, aktori i njohur vendosi të ndajë një rrëfim personal. Duke lënë mënjanë dritat e famës globale, ai foli me shumë dashuri për idhullin e tij: babanë. Gjatë fjalës së tij para publikut, Can theksoi se historitë e fëmijërisë së të atit e kanë bërë të lidhet akoma më shumë me këtë pjesë të origjinës.