Aktori kosovar bëhet për spital, i nënshtrohet ndërhyrjes kirurgjikale

Aktori i njohur kosovar, Kreshnik Ibrahimi, është shtruar urgjentisht në spital gjatë orëve të natës, ku më pas i është nënshtruar një ndërhyrjeje kirurgjikale.

Përmes një postimi emocionues, aktori ka bërë të ditur se operacioni ka përfunduar me sukses dhe se gjendja e tij shëndetësore është e mirë.

“Falënderoj Zotin. Mbrëmë gjatë orëve të natës jam shtruar në spital. Në orët e para të mëngjesit jam operuar dhe, shyqyr, jam mirë. Faleminderit shumë nga zemra familjarëve dhe shokëve që gjatë gjithë kohës kanë telefonuar për të ditur mbi gjendjen time”, ka shkruar ai.

Ibrahimi ka shprehur mirënjohje të veçantë për familjen, miqtë dhe të gjithë ata që janë interesuar për gjendjen e tij shëndetësore, ndërsa ka njoftuar se për një periudhë të shkurtër do të mungojë nga aktivitetet e tij.

“Më falni që do t’ju mungoj disa ditë. Ju përqafoj nga Spitali Ravensburg”, ka përfunduar aktori nga spitali ku po trajtohet në Gjermani.