Bordi i Zyrës së Rregullatorit për Energji (ZRRE) ka mbajtur më 24 dhjetor një takim koordinues me kompanitë e licencuara të sektorit energjetik për të vlerësuar sigurinë e furnizimit me energji elektrike gjatë periudhës së fundvitit.
Në njoftim thuhet se takimi u organizua për shkak se kjo periudhë “karakterizohet nga rritje e ndjeshme e konsumit të energjisë elektrike”. Gjatë diskutimeve u trajtuan sfidat që lidhen me kushtet dimërore, kufizimet teknike të rrjetit, balancimin mes prodhimit, importit dhe konsumit, si dhe funksionimin e sigurt të sistemit energjetik.
ZRRE bëri të ditur se operatorët kanë prezantuar kapacitetet dhe masat parandaluese për përballimin e ngarkesave të shtuara, ndërsa rregullatori ka kërkuar “hartimin dhe përditësimin e planeve të menaxhimit të gjendjes, përfshirë skenarë të mundshëm për situata të paparashikuara”.
Po ashtu, ZRRE u ka bërë thirrje qytetarëve dhe bizneseve që të përdorin energjinë elektrike në mënyrë të kujdesshme, duke theksuar se “kursimi i energjisë, veçanërisht në orët e pikut, kontribuon drejtpërdrejt në stabilitetin e sistemit”.
ZRRE ka njoftuar se do të vazhdojë monitorimin e situatës dhe bashkëpunimin me operatorët për të siguruar furnizim të qëndrueshëm me energji elektrike.
Njoftimi i plotë:
KOMUNIKATË PËR MEDIA
Më 24.12.2025, Bordi i Zyrës së Rregullatorit për Energji (ZRRE) ka mbajtur një takim koordinues me kompanitë e licencuara në sektorin e energjisë, përkatësisht me përfaqësuesit e Korporatës Energjetike të Kosovës (KEK), Operatorit të Sistemit të Transmisionit dhe Tregut (KOSTT), Operatorit të Sistemit të Shpërndarjes (KEDS) dhe Furnizuesit me Shërbim Universal (KESCO).
Qëllimi i takimit ishte vlerësimi i sigurisë së furnizimit me energji elektrike gjatë periudhës së fundvitit, një periudhë që tradicionalisht karakterizohet nga rritje e ndjeshme e konsumit të energjisë elektrike.
Gjatë takimit u diskutuan sfidat kryesore me të cilat zakonisht përballet rrjeti energjetik në periudha festive, përfshirë ndikimin e kushteve klimatike dimërore në stabilitetin e prodhimit dhe transmetimit; kufizimet teknike të rrjetit dhe nevoja për balancim të vazhdueshëm ndërmjet prodhimit, importit dhe konsumit; përmbushjen e obligimeve ndërkombëtare dhe funksionimin e sigurt të sistemit rajonal të energjisë; si dhe organizimin institucional gjatë periudhës së pushimeve dhe zgjedhjeve qendrore.
Përfaqësuesit e ndërmarrjeve të licencuara prezantuan kapacitetet teknike dhe operative për përballimin e ngarkesave të shtuara, si dhe masat parandaluese që janë ndërmarrë për të garantuar stabilitetin e furnizimit. ZRRE ka kërkuar nga operatorët përgjegjës hartimin dhe përditësimin e planeve të menaxhimit të gjendjes, përfshirë skenarë të mundshëm dhe planifikim paraprak të masave, në rast të situatave të paparashikuara.
ZRRE u bën thirrje qytetarëve dhe bizneseve që gjatë kësaj periudhe të tregohen të kujdesshëm dhe racionalë në përdorimin e energjisë elektrike. Kursimi i energjisë, veçanërisht në orët e kërkesës maksimale (pikut), kontribuon drejtpërdrejt në stabilitetin e sistemit dhe në sigurimin e furnizimit të vazhdueshëm për të gjithë konsumatorët.
Zyra e Rregullatorit për Energji do të vazhdojë të monitorojë nga afër situatën dhe të bashkëpunojë ngushtë me të gjithë operatorët e sektorit për të garantuar furnizim të sigurt dhe të qëndrueshëm me energji elektrike.
