Zelensky s’e njeh Kosovën, Bilalli: Kosova e Shqipëria s’duhet të rrinë duarkryq në diplomaci

Eksperti i sigurisë, Lutfi Bilalli, ka komentuar deklaratën e presidentit ukrainas, Volodymyr Zelensky, gjatë vizitës së tij në Serbi, se qëndrimi i Ukrainës për mosnjohjen e Kosovës mbetet i pandryshuar.

Bilalli tha se Kosova dhe Shqipëria duhet të reagojnë në aspektin diplomatik dhe të kërkojnë nga Ukraina më shumë kujdes në deklarimet e saj për Kosovën.

“Besoj që Kosova, thashë, por edhe Shqipëria, sepse ne nuk kemi raport dhe marrëdhënie diplomatike, ngase nuk na njeh Ukraina, por Shqipëria mund ta shfrytëzojë këtë rast dhe, në një farë mënyre, të kërkojë nga Ukraina që të jetë më e përmbajtur rreth deklarimeve të tilla eksplicite për njohjen e shtetit të Kosovës”, tha Bilalli.

Ai vlerësoi se Kosova ka qenë përkrahëse e Ukrainës që nga fillimi i luftës dhe se, për këtë arsye, deklarata e Zelenskyt duhet të merret seriozisht nga institucionet e vendit.

“Çka ka politika, moral dhe mirënjohje? Këtu ka dilemë, por besoj që në aspektin dhe deklarimin e tillë është jashtëzakonisht çështje që ne mund të na brengosë, por edhe ne duhet të jemi të përgatitur dhe mos të rrimë duarkryq në aspektin diplomatik”, tha Bilalli.