Vuçiqi paralajmëron Evropën: Jemi në prag të një lufte më të madhe

Si një nga të paktët liderë shtetërorë në botë, presidenti i Serbisë, Aleksandar Vuçiq, mban kontakte si me diktatorin rus Vladimir Putin, ashtu edhe me presidentin ukrainas, Volodymyr Zelensky.

Pas vizitës së parë të Zelenskyt në kryeqytetin serb, Beograd, Vuçiqi është shprehur i shqetësuar se Evropa mund të jetë në prag të një lufte edhe më të madhe.

“Besoj se jemi në fillim të një lufte më të madhe. Dhe për këtë arsye shpresoja që deri tani dikush tjetër të kishte bërë diçka për të vendosur paqen. Kjo nuk ka ndodhur dhe nuk do të ndodhë as së shpejti, që do të thotë se jemi në prag të një lufte shumë, shumë më të madhe”, ka thënë Vuçiqi në podcastin “MD MEETS”, të drejtuar nga Mathias Döpfner, kryetar i bordit drejtues të grupit medial me bazë në Gjermani “Axel Springer”.

Me pritjen e presidentit ukrainas, Vuçiqi ka befasuar komunitetin ndërkombëtar dhe ka shkaktuar kritika të ashpra në Serbi, e cila tradicionalisht ka qëndrim pro-rus, por edhe në Rusi. Propagandistët rusë e kanë akuzuar presidentin serb se po tradhtonte partneritetin me Rusinë dhe se po e ndihmonte Ukrainën në luftën kundër Rusisë përmes marrëveshjeve ekonomike. Zyrtarët qeveritarë ukrainas kanë deklaruar ndërkaq se vizita ishte një përpjekje për të krijuar përçarje mes Rusisë dhe Serbisë, dhe se ishte një “shuplakë në fytyrë për rusët”.

“Unë nuk jam këtu për t’u bërë qejfin rusëve, ukrainasve apo kujtdo tjetër, përveç serbëve”, ka thënë Vuçiqi në bisedën me Döpfner.

Ai ka shtuar se nuk e kishte informuar paraprakisht udhëheqësin rus Putin për vizitën e Zelenskyt.

“Nuk kam folur me të, sepse nuk e njoftoj askënd paraprakisht për agjendën time politike, pasi Serbia nuk është kukull e asnjë vendi tjetër në botë”, ka thënë Vuçiqi.

Duke folur për Vladimir Putinin, me të cilin, sipas deklaratave të tij, Vuçiqi ka biseduar “21 ose 22 herë”, presidenti serb ka thënë se “kohët e fundit kam pasur më pak kontakte me të sesa më parë”.

Presidenti serb ka vlerësuar se Ukraina “ka treguar aftësinë e saj reale për t’u mbrojtur”. Po ashtu sipas tij, Moska ka humbur ndikim në rajon gjatë rrjedhës së luftës.

“Për mua ishte e paimagjinueshme që Rusia të mund të humbiste njëfarë ndikimi në të dyja republikat e Kaukazit, në Azerbajxhan dhe Armeni...Të gjithë duan të shohin humbjen e palës tjetër”, ka deklaruar ai.

Vuçiqi ka thënë se udhëheqjet e Ukrainës dhe Rusisë ndodhen “nën një presion të madh”. Ndërkohë, parashikimi i tij për luftën, pas vizitës së Zelenskyt, është pesimist.

“Nuk shoh fundin e luftës këtë vit. Nuk shoh fundin e luftës as para pranverës së ardhshme. Po ju them pse: sepse besoj se njëra palë duhet të jetë më e fortë dhe, në një mënyrë apo në një tjetër, të dalë fituese, në mënyrë që lufta të përfundojë. Përndryshe, duke pasur parasysh ngërçin e sotëm, nuk shoh asnjë mundësi për zgjidhje kompromisi”.

Kreu i shtetit serb ka paralajmëruar fuqishëm kundër synimit për humbje të Rusisë dhe ka kërkuar që të bëhet gjithçka e mundur për të arritur një armëpushim, të cilin Rusia, megjithatë, e kundërshton kategorikisht.